Дар Рӯзи байналмилалии ҳифзи кӯдакон раиси шаҳри Хоруғ Кишвар Шамирӣ дар бинои “Pamir Plaza” – и шаҳр, Маркази хизматрасонӣ барои фароғати кӯдакони “Аладдин” – ро мавриди баҳрабардорӣ қарор дод.

Сараввал раиси шаҳр бо ҳайати кормандони марказ суҳбату мулоқот карда, бо шароити кории онҳо ва таҷҳизоту лавозимоти марказ аз наздик шинос гардид.

Зимни суханронии хеш Кишвар Шамирӣ қайд кард, ки дар баробари дигар шаҳру ноҳияҳои Ҷумҳурии Тоҷикистон дар шаҳри Хоруғ низ бахши хусусӣ ҳамаҷониба рушд намуда, ҷавононамон, ки қишри асосӣ ва ояндасози ҷомеа ҳастанд, дар он ҳиссаи сазовор доранд:

“Ин маркази хуштарҳу замонавӣ, ки баҳри дилхушии кӯдакон аз тарафи соҳибкори ҷавон Шерозшо Қурбошоев ҳамчун армуғон тақдим гашт, боиси фараҳмандии ҳамаи фарзандону волидон аст.

Бояд гуфт, ки дар Паёми навбатии Пешвои миллат муҳтарам Эмомалӣ Раҳмон ба Маҷлиси Олии кишвар дар заминаи Солҳои рушди деҳот, сайёҳӣ ва ҳунарҳои мардумиву баҳри ҷалби бештари сайёҳон ва муаррифӣ намудани ҷойҳои фарҳангӣ нуктаҳои муҳим таъкид шудаанд. Бинобари ин, бароямон муҳим аст, ки ба рушди соҳаи соҳибкорӣ, ба кор ҷалб намудани ҷавонон ва коҳиш додани сатҳи камбизотӣ бештар мусоидат намоем.”

Зикр шуд, ки марказ бо мабалағи 700 ҳазор сомонӣ сохта гардида, ҳоло дар он 10 нафар ҷавонони шаҳр бо ҷои кори доимӣ таъмин гаштанд ва марказ дар як вақт метавонад 100 нафар кӯдаконро кабул кунад.

Хадамоти матбуоти

МҲД – и шаҳри Хоруғ