Зери ҳамин унвон бо ибтикори Раёсати Вазорати корҳои дохилии Ҷумҳурии Тоҷикистон дар ВМКБ конференсияи илмӣ – назариявӣ гузаронид шуд, ки дар он раиси вилоят, муовинони раис, раиси шаҳри Хоруғ Кишвар Шамирӣ, кормандони масъули сохторҳои интизомию қудратӣ ва ҷавонон ширкат намуданд.

Дар конференсия вобаста ба конфронс маърўзаҳо баррасӣ гардиданд. Аз ҷумла, ҳуқуқшинос Давлат Холиқов зимни баррасии мавзўи «Ҷинояткории муташаккил захмест дар бадани ҷомеа» зикр намуд, ки ҷинояткории муташаккил падидаи бисёр хавфнок буда, дар кишварҳои пасошўравӣ, бахусус, Россия он баъди солҳои 90 – ум хеле рушдёфт, аммо бо кўшишҳои ҳукумати ин кишвар он саркўб гардид ва мавқеи худро аздаст дод. Имрўз сохторҳои махсус созмон дода шудаанд, ки бо ин гурўҳҳои муташаккили ҷиноӣ мубориза мебаранд. Дар кишвари мо бо саъю талоши ин сохторҳо аксарияти мутлақи ин гурўҳҳои муташаккили ҷиноӣ барҳам дода шуданд.

Коршинос Раҳматулло Қобилов бо таҳлили мавзўи «Ниқоби сиёсӣ» изҳор намуд, ки шахсиятҳои бузурги миллати тоҷик хизмат ба халқу Ватанро аз беҳтарин фазилатҳои инсонӣ шумурдаанд ва дар замони ҳозира хизмату садоқат ба ватан чун қарзи шаҳравандӣ дониста мешавад. Аммо тоифае одамон ҳастанд, ки ниқоби «ватандўстӣ» ба рўй кашида, манфиату ҳадафҳои гурўҳҳои алоҳида ва дигар давлатҳоро амалӣ карданӣ мешаванд ва дар ин роҳ аз бисёр василаҳо, махсусан аз шабакаҳои иҷтимоии Интернет ба таври васеъ истифода мебаранд. Ин зумраи одамон бо таъсиси ҲНИТ фаъолияти густурдаеро ба роҳ монданд ва хостанд миллати тоҷикро гумроҳ намуда, ба ҳадафҳои нопоки худ даст ёбанд. Ин иғвоангезии онҳо ба он оварда расонд, ки сентябри соли 2015 табаддулоти давлатӣ сар зад, аммо ба мақсад нарасиданд. Бо ҳамин кирдори разилонаи худ онҳо симои аслии худро нишон доданд. Ба ин хотир ин ҳизб террористию экстремистӣ эълон шуд ва фаъолияти он дар қаламрави кишвар мамнўъ гардид. Пас лозим аст, ки шаҳрвандони кишвар зиракии сиёсӣ зоҳир намоянд ва ба доми фиреби ин ташкилотҳои қудратталаб наафтанд.

Манбаъ: сомонаи МИМҲД – и ВМКБ

Муаллиф: Ҷангибек Улфатшоев